fbpx

مسؤول بمستشفى العزل: أرقام إصابات ووفيات كورونا المعلنة غير حقيقية وتتسبب فى الاستهتار

فجر نائب مدير مستشفي النجيلة للعزل الدكتور محمد علام، مفاجأة، حيث قال إن هناك معلومات خطأ كثيرة جدا بشأن الأرقام ويدور حولها تساؤلات مستمرة من الناس وللأسف الكثير لا يفهمون الأرقام صح “وفى ناس بتفتى كتير وفى فريق بياخد خبر بدون تدقيق يقول ان الوضع كارثى وينشره ويرعب الناس وفى بردوا ناس بتفهم بعض الاخبار ان الوضع حلو والدنيا زى الفل وتنشرها وده بيخلى الناس تهمل اكتر والحل هو الفهم الصحيح للوضع ولاى خبر علشان نتصرف صح الرعب مش مطلوب زى الاهمال بالظبط الاتنين مضرين والحقيقه هى الحل علشان بناء عليها الناس بتاخد قرارها بالالتزام أو التراخى”.

وأضاف علام، “هنحاول مع بعض نفهم القصه ماشيه ازاى ومعلش البوست طويل شويه هحاول ابسط وجهه نظرى على قد ماقدر والبوست ده لا دفاع ولا هجوم دى وجهه نظرى قد تكون صحيحه وقد تكون خطأ وممكن تتغير لو فى معلومات جديده مؤكده ظهرت، أولا عدد الحالات : لدينا حالات مؤكد إصابتها بكورونا وحالات محتمله وحالات اشتباه طبقا لبروتوكول وزاره الصحة، والحاله المؤكده هى المعلنه فقط فى الاحصائيات والباقى غير معلن وعددهم من وجهه نظرى مفروض من 10 ل 20٪ فقط من الحالات ان مكنش اقل ده بناء على الدراسات اللى اتنشرت عن انتشار العدوى، ولكن الأهم من رأيي هو تصريح لوزيره الصحة بيقول ان متوقع ان الاعداد المعلنه لا تمثل سوى 10٪ من الاصابات بالفيرس”.

وأكد علام، أن ذلك يرجع لأسباب كثيرة منها عدم ذهاب بعض المرضي للمستشفي وهذه نسبة كبيرة واهم الاسباب برأيي هى شروط عمل المسحه الشروط دى صح او غلط مش هحكم على النقطه دى لانى ليست لدى تفاصيل كافيه عن قدرتنا للتوسع فى عمل المسحات وقدرتنا لا يحددها سعر المسحه فقط ولكن تتحدد كمان بعدد المعامل والعناصر البشريه التى تقدر أن تعمل الاختبار وان كان رأيي ان الزياده فى عدد المسحات بيساعد اكتر لاقناع الناس ان فى خطر وكمان اقدر اسيطر على الانتشار اكتر وده ممكن ليه بديل وهقول اقتراح بكره مش مكلف وتمنى نفكر فيه ممكن يساعد ان الصوره توصل واضحه للناس وممكن يعمل فارق.

وتابع نائب مدير مستشفى العزل بالنجيلة: “هنيجى للسؤال المهم عدد الوفيات : وهنا عندى 3 اخبار اهمهم الاخير، تصريح منظمه الصحه العالميه بيقول مصر أكبر معدل وفيات فى الشرق الأوسط ؟؟
دى حقيقه اكبر معدل وفيات ومعدل الوفيات هو النسبه بين عدد الوفيات وعدد المصابين (المعلنين) والنسبه عندنا عاليه لاننا مبنعملش لكل المصابين مسحه وعندنا حالات محتمله وحالات اشتباه مش محسوبين لكن مش معنى التصريح ان عدد الوفيات هو الازيد فى فرق بين العدد والنسبه، بالإضافة الى تقرير bbc الذى يقول ان مصر بها زياده 60 الف فى عدد الوفيات عن العام السابق ؟؟
من رأيي مينفعش نقول ان الفرق ده مات بالكوفيد لو الرقم فعلا حقيقى وصادر من الجهاز المركزى للاحصاء لانى مشفتش اى بيان باعداد وفيات 2020 صدر وبيصدر فى شهر يوليو تقرييا من كل عام وان كان ممكن يصدر دلوقت عادى مش هياخد وقت وهيفيد جدا اننا نعرف اللى حصل العام السابق
المهم السبب انه مينفعش اقول دول ماتوا بالكوفيد اننا عندنا تفاوت فى نسب الوفيات سنويا يعنى 2017 كانت الوفيات 547 الف وفى 2018 كان 560 الف وفى 2019 كان 570 الف هتلاحظوا ان الرقم متغير وبيوصل ل 10 الاف بسبب الزياده السكانيه، ولكن هل هذا الكلام معناه ان الوفيات المعلنه هى الحقيقه ؟؟ الإجابة أيضا لا ولأسباب كثيره اهمها : أن هناك حالات تتوفى فى البيت وهى كوفيد ودى حقيقه، وفى حالات بتموت فى الاستقبال لانها اتاخرت من غير ميتعملها مسحه ودى حقيقه، وفى حالات بتموت فى المستشفى وهى حاله مشتبه بها او محتمله قيل نتيجه المسحه ودى حقيقه، وفى حالات بتموت فى المستشفيات الخاصه ودى حقيقه، والسؤال هل كل دول محسوبين كوفيد ؟؟ توقعى مش محسوبين كوفيد وهو ده الفرق اللى هنعرفه لما يتم اعلان معدل وفيات عام 2020″.

واستكمل علام: “اقدر اعرف ازاى الرقم الحقيقى لوفيات الكوفيد ؟؟
رقم حقيقى مش هوصله لكن هوصل لرقم تقريبى عن طريق معادله بسيطه (عدد حالات الوفاه بالتهاب رئوى او فشل بوظائف التنفس نتيجه التهاب فى الفتره السابقه مطروح منها عدد متوسط الوفيات بنفس الامراض الفتره السابقه)، بالاضافه انى بكون متوقع عدد الوفيات عام 2020 نفس عدد وفيات 2019 بالاضافه ليهم الزياده المتوقعه ولتكن 10 الاف وفاه يعنى اى عدد وفيات فوق ال 580 الف اقدر اقول ده معدل وفاه فوق المتوقع وطالما ممرتش بازمات او كوارث تسبب فى الالاف الوفيات هنعتبر الزياده بطريقه او باخرى سببها الكوفيد، والتصريح الثالث والاهم وهو تصريح لوزيرة الصحة فى مداخلة عن طريق Skype مع الاعلامى عمرو اديب فى برنامج الحكايه اتقال فيه رقم مهم جدا وهو ان وفيات الكوفيد فى 2020 تمثل 3.3 من وفيات مصر :
معنى الرقم ده ان الوفيات العام السابق بسبب الكوفيد قد تتجاوز ال 19 الف وفاه وده فقط اللى الوزاره اعتبرته كوفيد طبقا للتصريح واتقال فى نفس اللقاء اتقال (وأى حالة لم تسجل نتيجة لم تلجأ لوزارة الصحة) يعنى فى اكتر للاسف”

وتابع: “بقول الكلام ده ليه ؟؟
هكررها ده مش هجوم ولا دفاع وانا متاكد ان فى ناس هتفهمه هجوم وهتهاجمنى وناس هتفهمه دفاع وبردوا هتهاجمنى.
ده مجرد توضيح للحقيقه من وجهه نظرى لانى شايف ان فى خطأ كبيير بيحصل وفهم خاطئ للوضع مع ناس كتير
بقول الكلام ده علشان الناس اللى مفكره ان الوضع حلو واننا تمام تفوق شويه وان الناس اللى مفكره انها كارثه تعرف اننا لسه موصلناش للمرحله دى وممكن نوصلها لو استمرينا كده”.

واختتم علام: “لو هحسبها كدوله لو الوفيات وصلت ل 50 او 100 الف حتى انا مش شايف انها كارثه صحيه ضخمه فى الدوله فى دول كبيره تخطت الرقم ده بمراحل ، يعنى لو وفيات 570 وبقت 670 مش هتأثر على المجتمع ككل لانى عندى زياده سكانيه سنويا تتخطى المليون فلو بقت 900 الف مخسرتش حاجه كمجتمع وكدوله، ولكن كافراد وعائلات فى ضرر حصل وخساره وكارثه حصلت بفقد شخص عزيز علشان كده انا بكلم الناس من اول يوم وبكرر كلامى مره واتنين والف وقلت كده اكتر من مره وهفضل اكلمهم لحد لما ربنا يكتب ان الوباء ينتهى لان الخساره فى النهايه ليك انت واى حاجه تانيه هتتنسى.”